Në një periferi të Stokholmit, një person i veshur me të zeza u shfaq një natë dimri. Me pistoletë, iu afrua 20-vjeçarit Murad Abdelkader, student që po kthehej nga një turn në McDonald’s.

Personi i armatosur hapi zjarr, duke qëlluar vazhdimisht ndërsa i afrohej objektivit.

Vrasësi ishte 18-vjeçari Atilla Azimov dhe atë natë shkurti 2025, vrau personin e gabuar.

Këtë e bëri për para, i punësuar nga Foxtrot Network, një grup i krimit të organizuar me lidhje me regjimin iranian, famëkeq për taktikat e dhunës.

Që nga viti 2022, mendohet se Rrjeti Foxtrot ka qenë përgjegjës për rreth 35 vrasje, si dhe një numër goditjesh dhe përpjekjesh për sulme ndaj objektivave izraelite në Evropë, përfshirë dy që përfshinin eksplozivë dhe granata dore.

Banda rekruton adoleshentë për të kryer sulmet duke i paguar me para në dorë, por pothuajse kurrë nuk i duhet të paguajë pasi shpesh kapen.

Ashtu si Johannes Natland, adoleshent norvegjez i dënuar për komplot për vrasje nga një juri në Old Bailey në Londër, për një vrasje të planifikuar në West Yorkshire.

Sipas BBC-së që i referohet Task Forcës Operacionale (OTF) GRIMM, grup i Europolit i ngritur për të trajtuar problemin, vrasës adoleshentë me pagesë rekrutohen në mediat sociale dhe u jepen udhëzime, duke imituar mënyrën si funksionojnë lojërat kompjuterike.

Andy Kraag, kreu i Qendrës Evropiane Kundër Krimit në Europol, e quan këtë “delegim i llogaritur i vrasjes” te të rinjtë e cenueshëm.

OTF GRIMM përfshin 11 vende të prekura nga fenomeni VaaS:

Belgjika, Danimarka, Finlanda, Franca, Gjermania, Islanda, Holanda, Norvegjia, Spanja, Suedia dhe Mbretëria e Bashkuar.

Kreu i Rrjetit Foxtrot, Rawa Majid, është larguar nga Suedia, si dhe nga baza e tij operative në Turqi. Besohet se tani ndodhet në kryeqytetin iranian, Teheran.

Dyshohet se disa nga sulmet e VaaS-jt janë kryer për regjimin iranian, përfshirë një me granatë dore në ambasadën izraelite në Kopenhagen, megjithëse të tjera goditje, janë pjesë e luftërave të Foxtrot-it për territorin e drogës.

Diamant Salihu, gazetar investigativ për transmetuesin suedez SVT, ka bërë kërkime mbi Foxtrot-in dhe lidhjet me Iranin.

Regjimi po i urdhëron udhëheqësit e Foxtrot-it që ta nxisin rrjetin për të kryer sulme kundër armiqve të regjimit iranian.

Mund të jenë disidentë, gazetarë që janë në opozitë kundër regjimit dhe gjithashtu mund të jenë objektiva izraelitë.

Lidhjet me regjimin iranian filluan pas tetorit 2023 kur Majid iku në Teheran, tha Salihu.

Duhej të bënte një marrëveshje që të mund të jetonte i lirë në Iran, me kusht që ai dhe rrjeti i tij të punonin për regjimin.

Rrjeti Foxtrot dhe Majid u sanksionuan nga qeveria e Mbretërisë së Bashkuar, në prill 2025.

Ky ishte muaji pas arrestimit të Natland-it, i cili në atë kohë ishte 18 vjeç dhe pati fluturuar për të kryer një atentat në emër të Foxtrot-it diku pranë Huddersfield-it.

Rasti i Natland ilustron se si funksionon sistemi VaaS.

Natland është djali i dy gazetarëve në Stavanger dhe pas një jete të rehatshme, u zhyt në varësinë e drogës dhe zhvilloi psikozë, duke përfunduar në qendër rehabilitimi dhe në një shtëpi fëmijësh. Atje takoi një adoleshent tjetër që përdorte pseudonimin online UnknownHustler.

Ishte UnknownHustler që i dërgoi Natland-it kërkesën online për dikë që të kryente një vrasje në Mbretërinë e Bashkuar:

Vrasje në Angli 270,000 korona norvegjeze, rreth 21,000 paund. Kjo shumë kishte ardhur nga një adoleshent tjetër me pseudonimin Generalen.

Generalen, 16 vjeç në atë kohë, rekrutoi Natland-in për vrasjen.

Natland iu kalua më pas një anëtari të Foxtrot-it me emrin e përdoruesit online Agent 47, huazuar nga ekskluziviteti i lojërave Hitman.

Policia suedeze ka akuzuar Ali Shehad Ahmed-in, i afërt me udhëheqësin e Foxtrot, Majid, si Agjenti 47.

Agjenti 47 i rezervoi Natlandit biletë vajtje për në Aeroportin e Mançesterit dhe e ndihmoi në procesin e marrjes së një pasaporte emergjence.

Duke përdorur aplikacionin e mesazheve Signal, ai e udhëhoqi Natlandin në çdo fazë të udhëtimit të tij, përpara se t’ia dorëzonte një punonjësi të logjistikës me emrin e përdoruesit “1”.

Duke e trajtuar Natlandin pak si një personazh në një lojë kompjuterike, “1” i dërgoi një hartë dhe video që i tregonin se ku mund të gjente armët e fshehura në pyllin në Huddersfield dhe më pas një video tjetër që i tregonte se si të gjente një sasi parash të fshehura në shkurret pranë një tuneli këmbësorësh.

Pasi Natland u vendos në hotelin e tij në Huddersfield me armët, Agjenti 47 i dërgoi përsëri një mesazh: “Kemi shumë për të bërë nesër”.

Natland u arrestua të nesërmen në mëngjes. Atij ende nuk i ishte thënë se kë do të vriste dhe detektivët e antiterrorizmit ende po përpiqen të përcaktojnë nëse do të ishte një vrasje kriminale apo një vrasje politike e kryer për Iranin.

Top Albania Radio

Message History

Delivery option(s)