Времето денеска претпладне ќе биде сончево со умерена облачност, а попладне, особено во западниот и северниот дел, ќе биде нестабилно со краткотраен пороен дожд, грмежи и засилен ветер, локално во форма на краткотрајно невреме. Минималната температура ќе биде во интервал од 10 до 16, а максималната ќе достигне од 22 до 27 степени.

Во Скопје претпладне ќе биде сончево со умерена облачност, а попладне во делови од котлината ќе биде нестабилно со пороен дожд, грмежи, засилен ветер и услови за изолирана појава на град. Минималната температура ќе се спушти до 15, а максималната ќе достигне до 26 степени.

Од утре условите за пороен дожд со грмежи краткотрајно ќе се намалат, а поинтензивни процеси повторно се очекуваат од четврток и кон деновите од викендот.вј/хс/

Фото: МИА архива

The post Претпладне сончево, попладне краткотраен пороен дожд appeared first on Опсервер.

Во Собранието денеска треба да се одржат продолженијата на 66-тата и на 91-вата пленарна седница.

Единствена неразгледана точка на дневниот ред на 66-тата седница е Предлог-законот за изменување на Законот за квалитетот на земјоделските производи, по скратена постапка.

На 91-вата седница има уште 12 неразгледани точки меѓу кои се четири ратификации на договори, предлог финансиските планови на Регулаторната комисија за енергетика и водни услуги и на МРТ за 2023 година, како и интерпелација за работата на претседателката на Комисијата за прашања и изборите и именувањата, пратеничката Марија Георгиевска од СДСМ.

Во Собранието денеска седница ќе одржи и Законодавно-правната комисија на чиј дневен ред се четири барања за автентично толкување на закони и Предлог-законот за академија за судии и јавни обвинители, по скратена постапка.

The post Во Собранието продолженија на две пленарни седници и една комисиска расправа appeared first on Опсервер.

Според календарот на МПЦ (Јулијанскиот календар) денеска е 24 мај.

Слегувањето на Светиот Дух – Педесетница (трет ден)

Новозаветната Педесетница е денот на славното исполнување на ветувањето за Христовото испраќање на Светиот Дух врз апостолите. Ова е крајно радосен, извонреден и утешителен настан. Куќата во која тие пребиваат еднодушни одеднаш е преисполнета со шум од небото, сличен на силен ветар, а разделени јазици, како огнени, се спуштаат врз секого од учениците. Од ова тие се исполнуваат со Дух Свети и почнуваат да го благовестат Евангелието на разни јазици, онака како што Светиот Дух им даваше да изговараат. За разлика од мистиката на Успението на Пресвета Богородица, на пример, при доаѓањето на славата на Господ и другите одондестрани и чудесни појави кое им се открива како видение на некои од присутните, настаните на Педесетница стануваат очигледни за сите, не само за достојните. За да ги видат, на ерусалимјаните не им беше неопходен духовниот вид, иако на виденото не дадоа сите еднаков духовен одговор. Значи, зборувањето на сите јазици на кои луѓето од Ерусалим зборуваа (бидејќи во него живееја дојденци од разни краеви) едни го гледаа како прекрасно чудо, други како знак на пијанство. Петар вдахновено го објаснува настанот и ги упатува на пророштвата за овој настан до Избраниот народ дојдени преку Пророкот Јоил. Благовеста на Петар допре до срцата на многубројните луѓе што го чуја и тие го примија покајанието заради името на Исуса Христа. Во тој ден се крстија и присоединија кон Црквата Христова околу три илјади души. Оттогаш наваму Педесетница се смета за роденеден на црквата Божја. За првпат по падот човекот ипостасно Го прима Светиот Дух и ја добива полната и реална можност да живее според благодатта.

ОД КАТОЛИЧКИОТ КАЛЕНДАР

Денеска е 6 јуни.

Свети Норберт

Денешниот покровител е Норберт Ксантенски, архиепископ од Магдебург и основач на Премонстратенците. Роден е околу 1080 година во германскиот град Ксантен (Северна Рајна-Вестфалија), на левиот брег на Рајна, како син на Хериберт, грофот од Генеп. Како млад, тој стана канон на Конгрегациската црква во Ксантен. Тој бил воспитан во палатата на архиепископот во Келн, а потоа во царскиот двор на Хенри V. Посветен на световните задоволства, еднаш преживеал удар на гром кој го соборил од коњот и го онесвестил, само со Божја помош. Потоа реши да ги остави суетите и суетите на овој свет и влезе во бенедиктинскиот манастир во Зигбург, недалеку од Келн. Своите свештенички завети ги примил во 1115 година, а потоа се вратил во манастирот. Одличен проповедник и човек на дејствување, инспириран од духот на обновата, тој почна да ги посетува селата и градовите и да сведочи за евангелската сиромаштија преку зборот и животот. Многумина верници го следеа, а некои станаа негови ученици и соработници. Во 1120 година, тој го основал премонстратензискиот ред на бели августински канони, именувани по него, во средината на затскриената шумска долина во Премонтре (Пикардие), недалеку од Лаон во Франција. Со своите другари целосно се посветил на Бога и на апостолскиот живот. Тие се обиделе да живеат како Исусовите апостоли, во одрекување, сиромаштија и заедница. Тие станаа ревносни мисионери во Франција, Белгија и Германија, а попатно основаа нови манастири од машкиот и женскиот огранок од нивниот ред.

The post Од верските календари appeared first on Опсервер.

Денеска е вторник, 6 јуни 2023 година, 157-иот ден во годината. До крајот на годината остануваат 208 дена.

Сонцето во Скопје изгреа во 4 часот и 59 минути, а ќе зајде во 20 часот и 6 минути.

Денов трае 15 часа и 7 минути.

Месечината која е во фаза на полна Месечина нема да изгрее ова деноноќие, а ќе зајде во 6 часот и 41 минута.

The post Астрономски календар appeared first on Опсервер.

Иран досега не ги исполни доволно своите обврски за поголема транспарентност во однос на неговата нуклеарна програма, изјави денеска во Виена шефот на Меѓународната агенција за атомска енергија (МААЕ) Рафаел Гроси.

Во март, Гроси и властите во Техеран постигнаа договор за зајакнување на мониторингот на нуклеарните постројки, како и истрагите на претходно тајните нуклеарни локации во Иран.

Оттогаш е исполнет само „мал дел од она што го предвидовме“, рече Гроси за време на денешниот состанок на управниот одбор на МААЕ. Шефот на нуклеарната агенција призна дека се поставени голем број камери и уреди за надзор.

– Постигнат е одреден напредок, но не толку колку што се надевав … Она што треба сега да се случи е одржлив и континуиран процес што ќе доведе до спроведување на сите обврски без понатамошно одлагање“, додаде тој.

Гроси повторно истакна дека, спротивно на нуклеарниот договор од 2015 година, Иран веќе има складирано повеќе од 100 килограми високо збогатен ураниум со чистота до 60 проценти.

Според експертите, 50 килограми се доволни за да се создаде нуклеарно оружје доколку ураниумот се збогати уште малку повеќе.

The post Гроси: Иран не ги исполни доволно своите обврски за поголема транспарентност во однос на нуклеарната програма appeared first on Опсервер.

Караванот „Рамо до рамо до победа“ на СДСМ денеска беше на терен со граѓаните на Прилеп, Битола, Могила, Кичево, Тетово, Ресен, Карпош, Гевгелија и Долнени.

Како дел од караванот „Рамо до рамо до победа“ денеска со граѓаните на Битола беше Оливер Спасовски.

– Нашата држава, нашиот народ се исправени пред историска одлука да се продолжи европскиот пат на државата, преку усвојување на потребните реформи. Одговорност за тоа имаат сите 120 пратеници, сите политички субјекти, вклучително и ВМРО-ДПМНЕ. Изборот е едноставен: Интеграција во ЕУ или изолација. А видовме како изгледа изолацијата од 2006 до 2016 година, порача Спасовски во Битола.

Собранието е нашиот храм на демократијата каде на прво место мора да биде она што е во интерес на државата, додаде Спасовски.

-Повикувам на разум, овој период мора да вложиме максимални напори преку парламентарен дијалог да постигнеме консензус за промена на Уставот. Опозицијата мора да се прилагоди на европските услови и самокритички да ги преиспита своите постапки, додаде Спасовски.

Во општина Кичево беше Каја Шукова која пред присутните порача дека земјава веќе станува лидер на Балканот во делот на енергетска трансформација од обновливи извори и дека забрзувањето на европскиот пат ќе донесе пристап до нови фондови и нови проекти за заштита на животната средина и зајакнување на енергетската независност на државата.

Претседателката на Форумот на жени на СДСМ, Јована Тренчевска денеска, како дел од караванот „Рамо до рамо до победа“, беше меѓу граѓаните на општина Тетово.

– На дело покажавме што значи вистинска грижа за граѓаните, за унапредување на стандардот. Со успешни, ефикасни политики ги зголемивме платите во сите сектори, минималната плата од нецели 9.000 денари, ја покачивме на над 20.000 денари. Заедно со пензионерите договоривме методологија за усогласување на пензиите, со која 330.000 пензионери добија покачување од 16 отсто само за една година, а следното зголемување ќе биде во септември, истакна Тренчевска додавајќи дека СДСМ низ социјален дијалог постигна минималната плата и пензиите континуирано да растат,  без тоа да зависи од нечија политичка волја.

Тренчевска нагласи дека СДСМ посветено работи на намалување на невработеноста, која моментално изнесува 14 проценти.

Во Ресен, рамо до рамо со граѓаните, заедно со Мухамет Точи, беше членот на Извршниот одбор на СДСМ Никица Бачовски, кој се осврна на успешните земјоделски политики на СДСМ.

-СДСМ е вистински партнер на земјодлеците. Само за овие два месеци исплативме над 60 милиони евра субвенции кон 78.000 земјоделци. Деновиве на сметките на околу 10.000 корисници легнаа 290 милиони денари дополнителни субвенции за овоштарство, истакна Бачовски во Ресен, додавајќи дека од оваа година субвенциите ќе се исплаќаат авансно, земјоделците ќе ги добијат средствата тогаш кога им се најпотребни.

Бачовски нагласи дека државата е лидер во регионот по искористеност на ИПАРД и веќе започнува новата ИПАРД 3 програма, со која се доделени нови 98 милиони евра, европски неповратни средства за нови инвестиции.

Потпретседателот на СДСМ Фатмир Битиќи денеска беше во општина Карпош како дел од караванот „Рамо до рамо до победа“.

-Имаме силна поддршката од САД и цела Европа за нашите следни чекори за членство во Европската Унија.  Сите наши европски пријатели очекуваат од нас максимална одговорност за државничката одлука што треба да ја донесеме во наредниот период со измените на нашиот Устав. Заеднички е ставот на сите наши пријатели дека со тоа ќе направиме уште еден значаен чекор за просперитет и за европска иднина на сите македонски граѓани. Европа е нашиот дом.  30 години работиме напорно да ја реализираме стратешката цел – полноправно членство во ЕУ. А ЕУ значи повисок животен стандард, нови работни места, подобри услуги за граѓаните и повеќе можности за младите. Затоа, сите политички субјекти треба да се приклучат и да дадат поддршка да продолжи европскиот пат, посочи Битиќи.

Во општина Долнени беше Славица Грковска кои пред граѓаните порача дека годинешниот откуп на тутун и рекордниот износ на субвенции од 26 милиони евра исплатени кон тутунарите се доказ за вистинската грижа на СДСМ за сите земјоделци.

Денеска рамо до рамо со граѓаните на Прилеп беа генералниот секретар на СДСМ, Миле Зечевиќ Вардарски и претседателот на комисијата за транспорт и врски, Митко Трајчулески.

-Многу долг и трнлив пат сме изоделе и сите премрежја сме успеале да ги надминеме. Сега како народ, како нација и како држава имаме историска шанса да го продолжиме патот кон Европа и за навек да ги затвориме сите национални и идентитетски прашања. Аманетот на нашите предци, преродбеници, револуционери, борци од НОБ, не повикува на заедичка акција за сигурна македонска иднина, тоа е гласот за Европа, рече Зечевиќ.

Ние и како држава и како народ, мора да бидеме на мапата рамноправни европски држави, рамо до рамо со европските државотворни народи, додаде тој.

-Сами да одлучуваме за себе и за својата иднина, не други да носат одлуки за нас. Да ги браниме и европските вредности ама и македонските национални интереси седнати на големата маса во Брисел. Тоа е современиот македонизам! Затоа е важно да истраеме на вистинскиот, на европскиот пат, да го заокружиме овој процес целосно и до крај. Глас за Европа во Собранието е глас за сигурна македонска иднина, рече Зечевиќ.

Ние сме наследниците на делата на партизаните, на Народно ослободителната борба, на АСНОМ, на прогресот! И затоа што СДСМ и во минатото, и сега – во овој исклучително деликатен политички моментум – секогаш била на вистинската страна на историјата! Ние не сме наследници на Ванчо Михајлов, кој бил на погрешната страна на историјата, потенцираше Зечевиќ.

The post СДСМ со „Рамо до рамо, до победа“ на терен со граѓаните на Прилеп, Битола, Могила, Кичево, Тетово, Ресен, Карпош, Гевгелија и Долнени appeared first on Опсервер.

Во Албанија продолжува падот на бројот на населението па така на крајот на минатата година имала 2.761.785 жители или за 1,1 отсто помалку споредено со 2021 година.

Намалувањето на бројот на жители доаѓа од повеќе причини поврзани со демографската структура и извештаите за имиграција, што предизвикува континуирано намалување на населението од 1990 година.

-Само минатата година земјава броела 32.500 лица помалку, врз што влијание има и наталитетот на повозрасна возраст и изборот да се раѓаат помалку деца. Просечната возраст е зголемена на 38,8 години, од 38,2 години, колку што била во 2021 година, јавија медиумите повикувајќи се на државниот институт за статистика, ИНСТАТ.

Проценките на населението на 1 јануари 2023 година покажуваат дека само во еден округ, односно Тирана, забележан е раст на бројот на жителите, додека во другите единаесет окрузи забележан е пад на бројот на жителите, вклучувајќи го и Драч, кој до минатата година бележел позитивна стапка.

Во однос на полот, Албанија има 27.000 жени повеќе од мажи.

The post ИНСТАТ: Албанија има 2,76 милиони жители, просечната возраст достигнува 38,8 години appeared first on Опсервер.

Билетите за претстојниот натпревар на македонската фудбалска репрезентација во квалификациите за ЕУРО2024 против Украина од денеска се пуштени во продажба, објави Фудбалската федерација на Македонија (ФФМ).

Влезниците за гостувањето на Украина на Националната арена „Тодор Проески“ во Скопје, на 16 јуни, се продаваат по цена од 300 и 400 денари.

Навивачите ќе можат да купат влезници на билетарницата на Арената како и преку продажната мрежа на MKTickets со физичко присуство.

Едно лице може да купи најмногу четири влезници, а билети ќе бидат задолжителни и за деца независно од нивната возраст.

The post ФФМ: Билетите за дуелот со Украина од денеска во продажба appeared first on Опсервер.

Поранешниот американски потпретседател Мајк Пенс влегува во трката за републикански претседателски кандидат на изборите во 2024 година, според денешен поднесок до Федералната изборна комисија (ФЕЦ).

Пенс (63) ќе ја почне кампањата во Ајова в среда.

Пенс ќе му се спротивстави на Доналд Трамп, кому некогаш лојално му служеше, но одби да го поддржи кога поранешниот претседател се обиде да ги поништи резултатите од изборите во 2020 година.

Поранешниот конгресмен и поранешен гувернер на Индијана има силни конзервативни ставови за социјалните прашања и се повеќе се дистанцира од Трамп.

Тој рече дека поранешниот претседател ги охрабрил бунтовниците кои го нападнаа Капитол на 6 јануари 2021 година и ги ставија во опасност него и неговото семејство.

Пенс им се приклучува на се поголемиот број републикански кандидати, меѓу кои се Трамп, гувернерот на Флорида, Рон Десантис, поранешниот гувернер на Њу Џерси, Крис Кристи, сенаторот Тим Скот и поранешната гувернерка на Јужна Каролина, Ники Хејли.

The post Мајк Пенс се кандидира за претседател на САД appeared first on Опсервер.

Во рамки на акцијата „Ова е Македонија за сите“, ВМРО-ДПМНЕ вечерва во Велес организираше трибина на тема „Развојни политики за стабилна економија“.

Претседателот на ВМРО-ДПНЕ Христијан Мицкоски во своето обраќање на трибината порача дека нашата држава треба да добие фер шанса од Европската Унија, како што имале сите народи и држави, од кои не се барало себеодрекување и кои се охрабруваа и поддржуваа на патот кон ЕУ.

Во однос на лидерската средба, тој рече дека истата треба да биде тековна работа кога се разговара за државните интереси.

-Во државата направија тема од лидерска средба што во суштина треба да биде тековна работа кога се разговара за државните интереси. Се сопнаа и се заглавија на прашањето за форматот на средбата немајќи чувство за состојбата во која се наоѓа Македонија, ниту пак тежината за прашањата за кои мора да се носи одлука, рече Мицкоски.

Според Мицкоски, една суштинска средба за иднината на државата се претвори во борба за перцепција на власта, која е вистински неважна во пресрет на сериозноста на времињата и тешката позиција на државата.

-Ќе дојдам на лидерска средба и во името на огромното мнозинство на народот кој бара заштита и очекува застанување на нозе, ќе кажам дека уставни измени, прифаќање на бугарски диктат нема да има. Јас нема да дозволам да се прави крпа од волјата на народот како што тоа го прави власта, ниту пак да дозволам да газат по националните интереси. Македонија не е на распродажба, додаде Мицкоски.

Тој напомена дека е клучно да се отвори темата што по неуспехот на уставните измени.

-Се чини дека владата нема никаков план ниту пак говори за тоа. Од друга страна имаме премиер кој е уценет. Имаме премиер кој ДУИ го држи во заложништво, а токму тие се вистинските газди во владата, газди на криминалот и господари на туѓите судбини, додаде Мицкоски.

Градоначалникот на Велес, Марко Колев на трибината укажа дека има започнато низа на проекти, а оти дел од нив се веќе заокружени. Како прв проект, го посочи кејот на реката Вардар во Велес.

-20 години ветувања за овој проект и по неколку месеци макотрпна работа почна да се гради кејот од десната страна за да го затвориме тој проект затоа што Велес заслужува да има кеј, треба да бараме поддршка и од ЕУ зошто има подолг потег кој треба да се заокружи, рече Колев.

Колев исто така се осврна и на градскиот пазар во Велес кој во еден дел е завршен, а напомена дека акцент е ставен и на инфраструктурата.

-Десет години зборуваме и за пазарот. Во изминатава година се заврши горниот дел, а сега и долниот дел. И Велес ќе има модерен градски пазар. Работиме на патната инфраструктура, бидејќи беше во многу лоша состојба. Планираме 70 до 80 посто да бидат заокружени и за тоа секогаш има работа. Имаме и неколку улици кои ќе се комплетираат и во наредните недели и месеци.  Две улици во многу лоша состојба, а тоа се улиците Ганчо Хаџи Панзов и Орце Шутев, додаде Колев.

Потпретседателката на ВМРО-ДПМНЕ, Гордана Димитриеска Кочоска се осврна на економската ситуација во моментов.

-Ние економистите многу често го споменуваме БДП како показател за вкупната економска активност или велиме тоа значи колку е успешна една економија и го споредуваме со земјите од регионот. Клучно е да видиме што е тоа што влијае на БДП. Постојат различни методи на пресметка и еден од нив е дека БДП зависи од личната потрошувачка, јавната потрошувачка, инвестициите и ефектите извозот и увозот. Личната потрошувачка е она што ние го трошиме, а тоа што го трошиме оди преку платите. Платите ги исплаќа приватен сектор, државни претпријатија и јавна администрација. Јавната потрошувачка е трошокот кој го прави државата и имаме тековни расходи кои се за едно секојдневно работење плати, пензии субвенции трансфери и другиот дел се капиталните инвестиции, рече на трибината Димитриеска Кочоска.

The post Трибина на ВМРО-ДПМНЕ во Велес appeared first on Опсервер.

САД воведе казнени мерки против седум водечки членови на група поврзана со разузнавањето на Русија и еден ентитет поради вклученост во злонамерни кампањи за вршење влијание и дестабилизирачка кампања на Русија во Молдавија, се вели во денешното соопштение на Стејт департментот.

Овие актери се дел од глобалните информациски операции на Русија кои исто така ги таргетираа Соединетите Држави, Европската Унија, Велика Британија и земјите од Балканот, се вели во изјавата.

-Целта на овие дестабилизирачки операции е да се ослаби поддршката за демократските влади и принципи. Овие операции провоцираат, обучуваат и надгледуваат групи во демократските земји кои вршат антивладини протести, митинзи, маршеви и демонстрации со цел рушење на демократски избрани лидери и креирање или усложнување на нестабилноста.

-Денешните акции доаѓаат по оние на Европскиот совет и на Канада кои воведoa санкции против неколку лица за нивните постапки за дестабилизација, поткопување или закани по суверенитетот и независноста на Молдавија, се вели во соопштението.

На сите санкционирани лица им се забранува влез во САД, додека сиот нивни имот или сметки што се наоѓаат во САД или во сопственост на американски лица се блокирани и мора да се пријават кај Канцеларијата за контрола на странски активи при Министерството за финансии на САД.

The post САД со санкции против руското разузнавање кое се обидувало да ја дестабилизира Молдавија appeared first on Опсервер.

Претседателот на државата, Стево Пендаровски, денеска ги врачи инженерските прстени на 12 најуспешни дипломирани студенти од македонските факултети што негуваат инженерски дисциплини. Тој ги охрабри младите инженери да се вклучат во глобалниот натпревар на идеи и решенија што можат да придонесат за поодржлив раст и развој за Северна Македонија, за регионот и за Европа.

Во обраќањето на 20. јубилејна церемонија на „Инженерски прстен“, претседателот Пендаровски нагласи дека оваа манифестација во континуитет ја симболизира посветеноста на генерации млади луѓе кон инженерската професија и претставува потсетник за обврската да не се отстапува од високите професионални и етички стандарди на струката.

– Не случајно денешнава 20. јубилејна церемонија се совпаѓа со Светскиот ден на животната средина. Инженерите имаат клучна улога во изнаоѓањето на одржливи технолошки решенија за климатските промени и за заштитата на животната околина. Успесите што многу наши млади луѓе ги постигнуваат на меѓународните натпревари и конкурси сведочат дека македонската инженерска заедница не заостанува зад колегите од странство. Затоа, ве охрабрувам да се вклучите во глобалниот натпревар на идеи и решенија што можат да придонесат за поодржлив раст и развој за Северна Македонија, за регионот и за Европа, порача Пендаровски.

Добитници на признанието „Инженерски прстен 2023“ беа Елена Настеска од Архитектонски факултет, Димитар Гошев од Градежен факултет, Моника Шаревска од Машински факултет, Вероника Стојановска од Технолошко-металуршки факултет, Бојан Софрониески – Факултет за електротехника и информациски технологии, Симона Цветковска од Факултет за земјоделски науки и храна, Милена Трајаноска од Факултет за информатички науки и компјутерско инженерство, Ники Петрески од Факултет за шумарски науки, пејзажна архитектура и екоинженеринг „Ханс Ем“, Ева Ристова од Факултет за дизајн и технологии на мебел и ентериер, Антонио Андоновски од Природно математички факултет, сите од  Универзитетот „Св. Кирил и Методиј“ во Скопје, како и Ана Михаиловска од Факултет за природни и технички науки при Универзитетот „Гоце Делчев“ во Штип, Сара Петковска од Технички факултет Битола при Универзитет „Св. Климент Охридски“ во Битола.

Манифестацијата „Инженерски прстен“, која традиционално е под покровителство на претседателот на државата, а во организација на Инженерската институција на Македонија и на Комората на овластени архитекти и овластени инженери, се одржа во претседателскиот Кабинет.

The post Претседателот Пендаровски ги додели признанијата „Инженерски прстен 2023“ на 12 најуспешни дипломирани инженери appeared first on Опсервер.

ДУИ денеска ја прослави 21 годишнината како политички субјект. Преку панел дискусија прво, а потоа и на пригоден коктел, првиот човек на ДУИ г. Али Ахмети во кратки точки го елаборираше патувањето на политичкиот субјект кој го води. Претседателот Ахмети меѓу другото ги спомена успесите на ДУИ во изборните процеси, потпишаните и реализираните договори, како и многуте досегашни остварувања.

Во продолжение ви го пренесуваме во целост говорот на претседателот на ДУИ, г. Али Ахмети:

Заокруживме 21 година од денес од основањето на ОВК од политичка организација, заедно со истомислениците и активистите од времето кога Албанците во Македонија се соочуваа со најголемите неправди, исклучени од секој процес и маргинализирани.

Заедно, успеавме да го промениме правниот и политичкиот статус на Албанците од угнетени и маргинализирани во господари на сопствените домови и сопственици на сите национални вредности, почнувајќи од официјализирање на државното знаме, албанскиот јазик, застапеноста во администрацијата на сите нивоа со што Албанците во Република Северна Македонија се вистински господари во своите домови.

Затворивме историски поглавја, ја направивме најновата историја на оваа земја, нема историја на оваа земја без да бидеме дел од историјата на големата промена, ОВК и ДУИ како организација која околу себе собра идеалисти, мисионери, научници, слободољубиви миротворци, затоа 21 година по ред немаме никаков пораз, туку во секоја битка излегувавме како победници, поуспешни и погорди.

Не сакам да ги коментирам сите успеси што ги постигнавме од образованието и здравството бидејќи се многубројни, не сакам ни да ги опишам оние вредности кои ни го подигнаа достоинството, го институционализираа достоинството што го имаа многу генерации кои се бореа за тоа. Ние не сме од оние кои ни ја држат главата високо и празна затоа што не бевме први, но имаше и такви кои пред нас се спротивставија за подобро да се организираме, па зошто да не се потсетиме на нашите предци и непобедливиот, Неџат Аголи и инспирацијата со децении Рафи Халили, тоа беа оние кои не инспирираа и ни го одржаа духот да бидеме заедно денес.

Решивме после војната да ги обединиме Албанците затоа што не се боревме да ја делиме власта со другите, се боревме да бидеме рамноправни, да направиме големи промени и презедовме иницијатива со срце и душа четири години Албанците да функционираат како единствено тело за Охридскиот рамковен договор. За жал, за овој договор изразуваме благодарност до двајца учесници што го направија овој договор во Призрен кои веќе не се тука, но во овој момент да потсетиме дека оваа цел се оствари.

Ние ја продолжуваме нашата работа и нашите политики и кога имавме скептицизам дека земјата не станува членка на НАТО, но и ова прашање е реалност. Сега пред нас е неуморна работа што мора да се направи за членство во ЕУ, ние во раководните тела детално анализиравме која е најголемата потреба во оваа ситуација што може да послужи за ова членство кон ЕУ, секако дека тоа е Фронтот за Европа, затоа одржавме низа средби и консултации со електоратот на ДУИ и го прифативме и честитавме овој важен момент кој е толку корисен за граѓаните на државата.

Не застанавме тука, туку за идејата разговаравме и со други партии, вратите се отворени за сите политички партии и за оние на власт и за оние во опозицијата, Фронтот за Европа нема боја, но во рамките на овој фронт постои иднина и поголема услуга на граѓаните, а особено за нас како ДУИ не можеме да направиме повеќе од членство во ЕУ и тоа би било историски успех за државата и за ДУИ како фронт кој 20 години никогаш не отстапил од своите платформи кон крајните цели.

Откако ги реализиравме важните агенди одвоени од МО и Преспа, продолживме со силен интерес за инфраструктурата. Важно прашање за нас и за иднината на земјата и регионот е Коридорот 8, сега не е сон убиен во фиока која се чуваше затворена 30 години да не види сонце, Коридорот 8 веќе се отпочна со работа и за 5 години ќе се затвори целата инфраструктура, се разбира по цена од околу 2 милијарди евра за развој и економски напредок.

Веќе сме посветени на уставните измени, промената на Уставот треба да се случи како што се случи со Договорот од Преспа, Договорот за добрососедство, отворањето на Уставот и внесување на помалите заедници како Бугарите, Хрватите , Црногорците и другите, со кои конечно ќе се затвори едно историско поглавје и би се легитимирале на меѓународен план, а во тоа ја имаат нашата безрезервна поддршка, така што штом се случи оваа промена, ги охрабруваме политичките партии да го направат овој чин, особено ВМРО -ДПМНЕ да размисли и да не ја направат грешката што ја направија со Договорот од Преспа туку да дејствува за иднината на државата кон ЕУ.

Мислам дека ВМРО има капацитет и луѓе кои знаат да рефлектираат на политичките случувања во регионот на Западен Балкан. Нашата земја треба да биде пример, како што беше до денес, во однос на управувањето со состојбите дури и кога беа предвидени ризици за земјата, со разбирање и дијалог ги надминавме и денес сме добар пример што го земаат другите земји за управување со кризи, како што ние имавме.

Јас имам 21 година ангажман во ДУИ и над 20 години ангажман во НДК, секогаш сум поттикнувал на зближување и помирување на луѓето затоа што само со тоа што сме заедно можеме да бидеме успешни и никогаш не сум се разочарал затоа што навистина испадна успешно.

Избрав да бидам лојален пријател со сите истомисленици, ја избрав филозофијата на предавство но, не биди неверен, затоа што ја држиш главата зад себе и ја немаш пред себе, тоа води до смрт.

Не знам што лошо се случи со мене и ДУИ, 150 илјади гласачи што ја поддржуваат ДУИ, мало малцинство се тие што виделе материјални добра но, други се тие што уживале во општи добра, па да не ги повредиме 150 илјади луѓе што гласале за ДУИ.

Сега започнавме процес и ги спроведуваме одлуките на документите на КП и ДУИ каде беа распишани слободни избори, кои за прв пат се применуваат во земјава и регионот 1 член 1 глас, се одржаа во 11 ограноци и во 23 ограноци беа објавени и се утврдуваат координаторите, ЦИК ќе гласа на 2 јули, до тогаш ќе има отворена и натпреварувачка трка и ќе победат оние кои ќе ја имаат поддршката од мнозинството членство.

Денеска, секогаш им даваме простор на младите и кадрите кои пораснале во ДУИ.

Драги браќа и сестри,

Има многу да се разговара и разговара со вас, но би сакал да оставам простор да разговарате и да ги искажете вашите размислувања по повод оваа 21-годишнина на ДУИ.

Да живееме и сите заедно да одиме напред,

Господ нека ни е на помош.

The post Али Ахмети: Да се обединиме за европска иднина appeared first on Опсервер.

Ја гледам денес Радмила Шекеринска како глуми задоцнет патриот па вели да се имало разбирање за луѓето што се против промена на Уставот со цел влез на Бугарите во него.

Истата Шекеринска што беше втор човек на СДСМ и на Владата кога се потпиша Договорот со Бугарија со кој прифатија дека Македонскиот и Бугарскиот народ имаат ЗАЕДНИЧКА историја, а немаат! Истата која прифати промена на име и гордо се сликаше во Нивици. И истата која според многумина ги влече конците од позади сцена во СДСМ и со која Димитар Ковечевски се консултира за секоја покрупна одлука.

Таа Шекеринска продава задоцнет патриотизам. Извинете ама не поминува.

Како што Ви кажав на еден од нашите дуели кога го менувавте името на Македонија – ПРЕДАВСТВОТО ЌЕ ВИ ТЕЖИ ЦЕЛ ЖИВОТ!

И тогаш како и сега најголема нервоза ви е што не можете да го седнете ВМРО ДПМНЕ да го подржи предавството!

За овој договор кој значи капитулација на Македонија ние сме на РАЗЛИЧНИ СТРАНИ и НИКОГАШ НЕМА ДА СМЕ НА ИСТА СТРАНА, ПО НИЕДНА ЦЕНА!

Линк од најважните моменти од дуелот во 2018

The post Николоски: Шќеринска глуми задоцнет патриот, предавството ќе ви тежи цел живот ! appeared first on Опсервер.

Да го разрешиш кардиохирургот Јовев, човекот што го предводеше тимот за прва трансплантација на срце во земјава, заради банална причина е навреда за здравиот разум. Затоа мислам дека за сите нас како граѓани најдобро е ваквата одлука веднаш да се поништи.

The post Зоран Јовановски: Најдобро е ваквата одлука веднаш да се поништи appeared first on Опсервер.

Кристоф Галтие нема да ја одработи втората година од тренерскиот договор со ПСЖ, јавија денеска француските медиуми.

Француските новинари му поставија прашање на Галтие поврзано со продолжување на неговиот тренерски ангажман во ПСЖ по саботниот пораз од Клермон (2-3) во последното 38. коло во француското првенство, а тој најави состанок со клупското раководство.

„Тогаш ќе видиме какви одлуки ќе донесе управата“, изјави 56-годишниот Галтие, кој предвреме ќе замине од должноста, иако оваа сезона на клубот од Париз му ја донесе 11. шампионска титула во историјата.

ПСЖ под водство на Галтие оваа календарска година претрпе дури десет порази и имаше неуспешни настапи во францускиот куп и Лигата на шампиони.

The post Галтие предвреме ја напушта клупата на ПСЖ appeared first on Опсервер.

Главна цел на земјите од Западен Балкан е членство во Европската Унија, изјави денеска Дритан Абазовиќ, премиер на црногорската влада во технички мандат и координатор на Министерството за надворешни работи.

Абазовиќ ова го изјави во Будва, каде е домаќин на шефови на дипломатии и високи претставници на земјите учеснички во Процесот за соработка во Југоисточна Европа (ПСЈИЕ).

На состанокот, кој претставува еден од завршните настани во рамките на црногорското претседавање со ПСЈИЕ, присуствуваа, меѓу другите, вицепремиерката и министерка за надворешни работи на Косово Доника Гервала Шварц, шефовите на дипломатиите на Албанија и Северна Македонија, Олта Џачка и Бујар Османи, генералните секретари на Советот за регионална соработка и Централноевропската иницијатива Мајлинда Брегу и Роберто Антонионе.

The post Абазовиќ: Целта на земјите од Западен Балкан е заедничка европска иднина appeared first on Опсервер.

Украина има доволно оружје за контраофанзива против Русија, што на земјата ќе и донесе победа за влез во НАТО, изјави денеска украинскиот министер за надворешни работи Дмитро Кулеба.

Тој оцени дека членството во НАТО „веројатно ќе биде возможно за Украина дури по завршувањето на активните непријателства“.

Според светските агенции, Кулеба не одговорил на прашањето дали долгонајавуваната пролетна контраофанзива на Украина започнала.

The post Кулеба: Украина има доволно оружје за да започне контраофанзива appeared first on Опсервер.

Директорката на Европската централна банка (ЕЦБ) Кристин Лагард денеска изјави дека ценовните притисоци се „силни“ и нагласи дека ЕЦБ ќе ги зголеми каматните стапки доволно за да ја намали инфлацијата и ќе ги задржи „колку што е потребно“.

– Нашите идни одлуки ќе гарантираат референтните каматни стапки да се доведат до нивоа што се доволно рестриктивни за да се постигне навремено враќање на инфлацијата до нашата среднорочна цел од два проценти. Каматните стапки ќе се задржат на тие нивоа онолку долго колку што е потребно, рече Лагард.

Таа истакна дека инфлацијата е најголем товар за обичните луѓе, особено за оние кои имаат ниски приходи и поголемиот дел од приходите го трошат на храна и енергија.

The post Лагард: ЕЦБ ќе ги зголеми каматните стапки за да ја намали инфлацијата appeared first on Опсервер.

Шпанскиот премиер Педро Санчез денеска изјави дека предвремените парламентарни избори во неговата земја на 23 јули нема да влијаат на шпанското претседателство со Советот на ЕУ, кое започнува три недели порано и трае до крајот на годината.

Социјалистичкиот лидер пред една недела ги изненади сите кога објави распишување предвремени избори кои првично беа планирани за крајот на годината. Тој тоа го соопшти ден по поразот на шпанската левица на локалните и регионалните избори од конзервативците.

– Нема никаков ризик целите што ги поставивме за тоа претседателство пред да ги распишеме изборите да не бидат исполнети, изјави Санчез за време на посетата на неговиот шведски колега Улф Кристерсон.

– Целите се дефинирани. Покрај тоа, тоа не се цели поставени само од шпанското претседателство, тоа се цели што ги споделуваат другите земји-членки, Европската комисија, рече тој.

Тој потсети дека и други земји имале избори за време на нивното претседавање со ЕУ и немало никакви проблеми.

Кристерсон, чија земја претседава со ЕУ во првата половина од оваа година, исто така оцени дека изборите во Шпанија не претставуваат „никаков проблем“ и го наведе примерот на Франција, каде последните претседателски избори се одржаа во април 2022 година во средината на француското претседателство со Унијата.

Санчез требаше да ги претстави главните карактеристики на шпанското претседателство пред Европскиот парламент на 13 јули, но Мадрид успеа да го одложи за септември, кога Шпанија би можела да има нов премиер доколку Санчез загуби на изборите во јули.

The post Санчез: Изборите во јули нема да влијаат врз шпанското претседателство со Европската унија appeared first on Опсервер.