Со отпаден инертен материјал и отпадна земја се покрива и последната опожарена ќелија на депонијата во Алинци. Депонијата веќе е целосно заштитена за што се употребени над 3500м3 покривка. Огнот целосно беше локализиран во саботата, за што од средата при избивањето на првиот пожар од јужната косина и сртот беше ангажирана градежна механизација, цистерни и товарни возила за дотур на материјал за покривање – информираат од ЈКП Комуналец Прилеп.

-И покрај локализирањето на првиот пожар од 26. 09. 2023 година, на 28.09.2023 година( петок), од сега непознати причин рано утрото, околу 04:00 часот, од западната косина па се до сртот, неочекувано изби и вториот поголем пожар за кој исто стручните лица од ,, Комуналец”, сметаат дека е подметнат. Брзото проширување на огнот повторно зафати голем дел од платото, кое за среќа редовно се покрива со земја и не дозволи огнот да се шири кон средината на депонијата. Со огромна стручна помош од ДЗС, ангажирањето на комуналните работници, ТППЕ, и дополнителен ангажман на градежни машини и транспортни возила од вчера е изгасната и последнат опожарена ќелија на депонијата која зафаќа пристор од 28.600м2 – стои во соопштението од ова јавно претпријатие под чија надлежност е градската депонија кај Алинци.

Катастрофалните политики и немањето ниту малку доблест и грижа за студентите, доведе до создавање на трул систем од кој се повеќе млади се разочаруваат и својот спас го гледаат надвор од границите на Македонија – истакна на прес конференција Илија Ристески од Прилеп, член на ИК на УМС на ВМРО-ДПМНЕ.

Прес конференцијата во целост ја пренесуваме во продолжение:

На само ден пред почетокот на академската година, над 200 студенти од цела Македонија, се уште се наоѓаат на фамозната листа на чекање, а притоа немаат добиено никаква информација за тоа дали воопшто се примени во еден од студентските домови или пак во кој студентски дом ќе бидат сместени.

Над 200 млади студенти кои решиле да се посветат на градење сопствена иднина во Македонија, се оставени во неизвесност, несигурност и без гарантиран покрив над глава.

Сето ова, е резултат на неспособните партиски кадри на социјалдемократската младина, кои во моментот се кријат и не даваат никакви одговори во однос на овие прашања, бидејќи за нив студентите и младите се секогаш на последното место во приоритетите. Овие пропаднати и некадарни поединци, се уште не даваат никаков одговор околу тоа дали студентите, во 21 век и 2023 година, воопшто ќе имаат обезбеден доручек за кој самите плаќаат при престојот во студентските домови.

Студентите од 2017 година па навака, сведочат на едно системско уништување и рушење на соништата на младите, на воспоставените пракси, и со тоа удираат врз она што е најважно за една држава – образованието и иднината. Од таа 2017 година, која наместо година на надеж како што тие ја претставуваа се претвори во кобна година за Македонија и македонскиот народ, студентските домови кои беа целосно реконструирани во време на владеењето на ВМРО-ДПМНЕ, како и за сите останати капитални проекти во државата, се оставени да скапуваат, а младите се упатени да преживуваат со 140 денари и супстандардни услови карактеристични за животот во минатиот век.

Оваа негрижа и свесно уништување на малкуте работи кои останаа на користење на младите, укажува на тоа дека близу 1500 легла наменети за студенти низ Македонија се празни. Ниту трага ниту глас од оние кои заминаа и кои оваа власт ќе ги враќаше да ги подигнат патиките од пред влада, ниту трага ниту глас од студентскиот град со кој се фалеа, ниту трага ниту глас од надежта и иднината кои тие ги ветија пред цели 6 години.

Уништувањето на се што им беше оставено во студентските домови претставува и соодветна метафора за тоа што се случува во Македонија во последните 6 години. Целото газење на достоинството на секој еден граѓанин се однесува и на студентите, а лажните ветувања се однесуваа и на младинските политики, но и на прашањата како националните интереси.

Почитувани,

Ви се обраќаат токму оние кои останаа во Македонија, решени да се борат против вашиот криминал и неправди, младите од кои вие најмногу се плашите. Младите на кои им ветувавте многу, а не им испорачавте ништо.

Унијата на млади сили на ВМРО-ДПМНЕ во наредниот период ќе ги преземе сите расположливи механизми за адресирање и решавање на овие проблеми, институционално, но и вон институциите или на улиците доколку има потреба. Лажните борци за младите и кадрите на социјалдемократите треба да бидат свесни за злоделата кои ги нанесоа на секој еден млад човек во Македонија. Одговорност, ќе има!

Во организација на најпознатиот боди билдер од Битола – Зоран Лазаревски Паљо и боди билдинг федерацијата на Македонија, синоќа во големата сала на Домот на културата се одржа вториот по ред “Паљо класик опен 2023“.

Популарниот Паљо на едно место ги собра најдобрите боди билдери и боди билдерки од цела Македонија, и приреди шоу за паметење кое траеше цели 2 и пол часа.

Салата во Домот на културата во Битола беше исполнета до последно место, а имаше и што да се види. На сцената продефилираа голем број боди билдери и билдерки, кој од кој подобар.

Секако најголем интерес предизвикаа девојките, а една од оние кои пленеше беше младата прилепчанка Андреа Аврамоска, која освои сребро во категоријата бикини фитнес. Андреа е вистински пример за тоа како се постигнуваат врвни резултати со напорна работа и посветеност.

Ова беше нејзино прво натпреварување, а во остварување на нејзиниот сон и помогна уште една шампионка, Ангела Гелинческа и “Еlite Gym”.

Честитки до Андреа за постигнатиот успех и желби за уште поголеми достигнувања во иднина!

ФОТО/ФБ/Аndrea Avramoska

Фудбалерите на Победа лошо ја започнаа сезоната во Втората фудбалска лига и после 7 одиграни кола освоија само 8 бода. Поразот од Саса во Македонска Каменица викендов ги смести прилепчани на 11-то место на табелата, па јасно беше дека нешто треба да се менува.

Пред домашниот натпревар против Детонит Плачковица, кој идниот викенд ќе се игра на стадионот “Гоце Делчев”, Победа ќе има нов тренер.

Од клубот информираат дека постигнале меѓусебен договор со тренерот Филип Мирчески за престанок на соработката и дека за многу скоро време црвено-белите ќе добијат нов предводник на клупата.

https://www.facebook.com/photo/?fbid=260080037016159&set=a.101220659568765

Останува да видиме кој че се одлучи на ваков храбар потег, да ја преземе Победа под своја палка, особено сега кога клубот е веќе далеку од местата кои носат пласман во најелитното фудбалско друштво кај нас.

На 30.09.2023 во 09.00 часот во с.Веселчани, полициски службеници од ОВР Прилеп го лишиле од слобода С.П.(23), затоа што околу 06.00 часот допрел по ногата 19-годишна девојка, а потоа физички ги нападнал неа и нејзината 18-годишна колешка.

По целосно документирање на случајот ќе следи соодветен поднесок – информираат од СВР Прилеп.

Црковниот храм Света преподобна маченица Параскева (Петка) – Римјанка во населбата “Точила” во Прилеп, упати апел за донации до верниците.

Потребни се парични средства за да се изгради продавницата за свеќи во дворот на црковниот храм, а сите кои се во можност донациите можат да ги уплатат на следната жиро сметка:

Прилепчанка паднала во автобус и добила тешки телесни повреди. Случајот бил пријавен вчера во СВР Скопје од Градската општа болница „Св.Наум Охридски“.

Било пријавено дека кај нив со тешки телесни повреди била донесена Ч.М.(67) од Прилеп. При извршен службен разговор со полициските службеници, таа појаснила дека со повредите се здобила на 29.09.2023, при пад во внатрешноста на автобус, додека се превезувала како патник од Транспортен центар кон блискиот трговски центар.

Од страна на полициските службеници службен разговор бил извршен и со возачот на автобусот.

Големиот пожар кон вчера попладнето изби во близина на прилепското село Мало Рувци, утрово е ставен под контрола. Во големата огнена стихија изгореа неколку куќи во селото Мало Рувци, како и трпезаријата од селската црква. За среќа се работи за куќи кои се или напуштени, или нивните сопственици ги користеле како викендици, па нема човечки жртви.

Огнот зафати и огромна површина со трева, а наместа гореше и борова шума. Должината на протегање на огнената стихија беше од Мало Рувци, па се до Канатларци, а огнот опасно се закануваше да се прошири и кон Штавица.

Во гаснењето освен екипи на ТППЕ, се вклучија и повеќемина доброволци, како и вработени во јавните градски претпријатија. Гаснеше и градоначалникот на општина Прилеп, Борче Јовчески, кој апелира да не се пали оган во шуми и да престане палењето на стрништа од поединци.

Јовчески информира дека состојбата е сега ставена под контрола и пожарот е целосно локализиран.

Двократниот европски шампион синоќа се прошета во Прилеп и на домаќините им го нанесе вториот овосезонски пораз во ракометната Супер лига со 22-35 (11-18 на полувремето)

Победата на вардарци во ниту еден момент не беше доведена во прашања, а прилепчани имаа водство само на стартот од натпреварот со 1:0.

Иако домаќините влегоја мотивирани во овој натпревар и со желба да направат некакво изнандување, сепак Вардар е Вардар и не си дозволи таков луксуз.

Кај РК Прилеп на Никола Цветаноски уште еднаш ја покажа својата класа постигнувајќи 8 погодоци. А конкуренција му беше вардарецот Матија Николиќ кој реализираше дури 11 пати.

Прилепчани во наредното коло ги очекува гостување кај Мулти Есенс.

Основното јавно обвинителство Кавадарци донело наредба за спроведување истражна постапка против државјанин на Република Албанија со привремен престој во Кавадарци, за кого, како што појаснуваат од Обвинителството, „постои основано сомнение дека сторил тешки дела против безбедноста на луѓето и имотот во сообраќајот од член 300 став 1 во врска со член 297 став 1 од Кривичниот законик“.

– На регионалниот пат Р1103 Кавадарци – мотел Дреново, на 29 септември, осомничениот под дејство на алкохол во крвта, управувал со товарно возило „Форд транзит“ во сопственост на кавадаречка фирма. Кога пристигнал кај местото викано „Лазово мовче“, пред него се движела работна машина – трактор со приколка. На место забрането за престигнување, обележано со полна линија, во близина на кривина во лево, осомничениот започнал да го престигнува тракторот и тоа без да ја прилагоди брзината на возилото. Со предниот дел од камионот, при престигнување удрил во задниот дел на приколката, се вели во соопштението од Обвинителството.

Тракторот излетал од коловозот во лево, а камионот се извртил странично на спротивната сообраќајна лента, удирајќи во автомобил „Мини купер“ со прилепски регистарски ознаки кој доаѓал од спротивен правец.

Во несреќата, како што појаснуваат од Обвинителството, возачот на тракторот се здобил со тешка телесна повреда, со телесни повреди се здобил и возачот на прилепскиот автомобил, а шоферот на камионот го напуштил местото на настанот.

– Бидејќи постои опасност од бегство, по предлог на јавниот обвинител, Основниот суд во Кавадарци определи мерка притвор во траење од 30 дена за осомниченото лице, соопштија од Обвинителството.

Денеска во Неготино се одржа меморијалниот турнир во борење “Јован Димитров”. На турнирот учество зеде и прилепскиот клуб “7-ми Мај”, a нивните борачи и борачки забележаа одлични резултати:

Во женса конкуренција прилепскиот клуб освои три први и едно второ место.

Ангела Трајкоска – 1-во место во категорија до 48кг,
Тамара Цветкоска – 1-во место во категорија до 57кг,
Анабела Стојаноска – 1-во место во категорија до 54кг,
Марија Велјаноска – 2-ро место во категорија до 44кг.

Во машка конкуреција прилепчани стигнаа до три бронзи. Со медали се закитија: Андреја Трајкоски во категорија до 28кг., Стефан Аризанкоски во категорија до 36кг. и Антонио Цветаноски во категорија до 30кг.

Голем пожар попладнево пламна во близина на прилепското село Мало Рувци. Зафатена е голема површина со сува трева, а наместа гори и борова шума. Пожарот се шири кон селото Штавица, па од црковниот одбор на црквата Рожденство на Пресвета Богородица во ова село, упатија апел за помош до сите граѓани кои се во можност да дојдат и да помогнат во гаснењето.

-Повик до сите штавичани и прилепчани кои се во можност да помогнат во гаснење на пожарот, кој се шири од с. Мало Рувци, кон село Штавица. Секој кој може нека помогне! – стои во апелот за помош.

Голем пожар попладнево пламна во близина на прилепското село Мало Рувци. Гори сува трева, а на места и борова шума. Пожарот се простира на голема површина и се шири кон целото Штавица.

Екипи на ТППЕ Прилеп се излезени на терен. Засега нема информации која е причината за овој најнов пожар во околината на Прилеп.

Екипата на САСА од Македонска Каменица стигна до првата сезонска победа во Втората фудбалска лига, откако попладнево со пресврт во второто полувреме триумфираше на Победа со 2:1.

Црвено-белите водеа на полувреме со голот на Дарко Грозданоски во 45-та минута, а во вториот дел САСА дојде до пресврт со головите на Сашо Дуков, најпрво во 63-та минута од белата точка, и во 88-та минута.

Прилепчани после натпреварот се пожалија на судењето на овој натпревар, а за главниот судија велат дека досудил непостоечки пенал.

Всушност, на натпреварот во Македонска Каменица, правдата ја делеше истиот судија кој пред неколку кола исклучи тројца играчи на Победа, на натпреварот против Осогово во Прилеп.

Со овој нов пораз Победа тони на табелата и сега е на 11-то место со само 8 освоени бода после 7 одиграни кола. Наредниот викенд црвено-белите ќе ја дочекаат екипата на Детонит Плачковица.

На 29.09.2023 во 14.30 часот Е.П.(38) од Битола пријавила дека на 28.09.2023 околу 12.00 часот, во двор од основно училиште во Битола, нејзиниот малолетен син бил физички нападнат од негов соученик.

На 29.09.2023 во 16.30 часот И.Т.(41) од Битола пријавила дека околу 12.00 часот во Битола нејзината малолетна ќерка била физички нападната од друга малолетничка.

Се преземаат мерки за расчистување на двата случаи – информираат од СВР Битола.

Синоќа, 29.09.2023 во ликовниот салон од ЦК “Марко Цепенков”во Прилеп, беше отворена изложбата “Копнежот на светлината” од Душан Коцев.

Уметникот кој одбележува 30 години уметничко творештво се претставува со 22 дела. На отворањето Коцев рече:

“Моите дела се приказна на светлината и мракот, одраз на патот што го изминуваме во борба со светлината. Тие ни ја прикажуваат тежината на борбата, но ја подигнуваат светлината на надежта што несомнено се наоѓа во секој аспект на човековиот живот.Делата не потсетуваат дека светлината никогаш не избледува…Делата се доказ дека светлината може да биде најсилната креативна сила способна да ги осветли и најдлобоките аглови на човечката душа и да ни помогне да ја победиме темнината”.

Душан Коцев е роден во Радовиш. Годинава полно 30 години активно уметничко творештво. Досега реализирал пет самостојни изложба, а бил учесник на групни изложби во земјата и во странство. Осум години е организатор на Радовишката ликовна колонија.

На 29.09.2023 во 18.45 часот било пријавено дека на регионалниот пат Дреново-Кавадарци, поточно кај место викано „Лазов мост“, се случила сообраќајна несреќа помеѓу товарно возило „форд“ со кавадаречки регистарски ознаки, патничко возило „мини купер“ со прилепски регистарски ознаки, управувано од С.Б.(25) од с.Воѓани, прилепско и трактор со приколка со кавадаречки регистарски ознаки, управуван од Б.Т.(62) од Кавадарци.

По несреќата, возачот на товарното возило го напуштил местото, но по кратко време бил пронајден од полициските службеници и лишен од слобода, при што било констатирано дека станува збор за К.А.(47) од Р.Албанија, со престој во Кавадарци.

Во несреќата возачот на тракторот се здобил со тешки телесни повреди, а возачот С.Б. со телесни повреди, констатирани во Општата болница Кавадарци.

Извршен бил увид од увидна екипа од Полициската станица Кавадарци – информираат од МВР.

СВР Тетово поднесе кривична пријава против Ш.А.М.(19) од Таџикистан поради постоење основи на сомнение сторено кривично дело „тешка телесна повреда“.

На 27.09.2023 во студентски дом во Тетово, по претходна расправија, пријавениот физички го нападнал Х.Т.(21) од Пакистан и му нанел повреди.

Од денеска малопродажната цена на бензинот ЕУРОСУПЕР БС-98 ќе се намали за 2 денари, додека цените на бензинот ЕУРОСУПЕР БС-95, на ЕУРОДИЗЕЛ (Д-Е V), на екстра лесното масло за домаќинство и на мазутот М-1 НС не се менуваат, одлучи Регулаторната комисија за енергетика (РКЕ).

Моторниот бензин ЕУРОСУПЕР БС ќе биде 95 87 денари за литар, ЕУРОСУПЕР БС 98 89 денари, дизел горивото ќе чини 85,50 денари, екстра лесното масло 85 денари, а мазутот 48,715 денари за килограм.

Со оваа Одлука на РКЕ се врши намалување на малопродажните цени на нафтените деривати во просек за 0,44 отсто во однос на одлуката од 29.9.2023 година.

Градоначалникот Јовчески со апел до Министерството за транспорт и врски:

– Реакциите на граѓаните и бизнис секторот во однос на „Реконструкцијата на улицата Леце Котески“ се комплетно оправдани, но јавноста мора да знае дека адресата на која што стигнуваат ваквите реакции е погрешна, затоа што Општина Прилеп не е ниту инвеститор ниту изведувач ниту пак надзор на овој проект.

Станува збор за проект за поврзување на локални патишта, финансиран од Меѓународна банка за обнова и развој-Светска банка, имплементиран од страна на Министерството за транспорт и врски а се спроведува од изведувач кој што по пат на тендерирање го имаат одбрано од истото Министерство.

Што се однесува до нашите обврски како Локална самоуправа на Општина Прилеп кои што се вклучени и во договорот кој што го потпишавме со Министерството, сакам да ја известам јавноста дека ја имаме доставено комплетната проектна документација, заедно со основниот проект, сите потребни извештаи, дозволи, потврди и сообраќаен режим.

Морам да истакнам за оваа улица која го поврзува нашиот град со соседните општини Крушево и Кривогаштани, дека наша обврска меѓу другото е да изразиме загриженост и да ги поддржиме нашите сограѓани во нивните оправдани реакции и барања, за што е можно побрзо завршување на овој проект од витално значење за Прилеп и прилепчани.

Денес сме тука на лице место и го слушнавме локалното население и дел од стопанствениците кои што имаат тука и производствени погони. Ставот на сите е дека движењето и транзитот на оваа улица се веќе неподносливо отежнати, дека трпат големи штети и по бизнисите и по своите возила, и дека ваквиот хаос временски се провлекува веќе неколку месеци. Токму затоа е и оваа реакција упатена кон Министерството, кон изведувачот и кон надзорот: Упатуваме апел да се води грижа за динамиката на работа на самата улица и етапно да се обезбедуваат поволни услови за движење на граѓаните и на возилата.

Во спротивно, ваквата незаинтересираност остава оправдан сомнеж дека работата можеби намерно се пролонгира, како би се создал што е можно поголем револт, кој свесно се насочува на погрешна врата, во случајот кон локалната власт, наместо кон централната.
Нашиот град и нашите сограѓани дефинитивно заслужуваат побрзо решавање на овој „горлив проблем“ што негативно се одразува врз нормалното секојдневно функционирање на прилепчани, а станува збор за една од најфреквентните улици во Прилеп.

Јас како градоначалник имам обврска да се грижам за сите наши сограѓани и за стопанството во нашата општина, затоа ги вложувам сите мои напори, а тоа ќе го правам и во иднина со цел Министерството да ги испочитува, ветувањата, роковите и динамиката за реализација, и заедно со Вас граѓаните ќе дејствуваме оваа сообраќајна артерија на градот да биде што побрзо во целосна функција.