Сточарите од Брегалничкиот регион бараат реална откупна цена на јагнешкото месо. Сметаат дека цената од 180 до 190 денари за килограм жива мера не им е ниту исплатилива, ниту доволна за да преживеат.

Наспроти ова, во месарниците цената на јагнешко месо се продава по цена од над 540 денари за килограм. Сточарот Омер Бајрам од штипското село Лакавица е единствениот кој останал да чува овци. Посочува дека цената на храната е висока, има многу работа околу овците и јагнињата, а како што вели, на крајот речиси и ништо да не останува. Според него реалната откупна цена на јагнето треба да биде околу 280 денари.

-Цената да ти кажам сега за сега е заникаде. 180 до 190 денари жива мера е, а во месарниците е 500 до 600 денари. Ние не можеме со ваква цена да останеме, килограм концентрат е 30 денари, јачмен 21 до 22 денари, не сме благодарни од цената. Реалната цена треба да биде барем двојно, оти 100% сè е поскапено, минимална треба да е 260 до 280 денари, вели Бајрам.

Иако има 400 грла овци, тој не произведува сирење и урда, бидејќи и тоа е неисплатлво, а ниска е и цената на млекото, кое се откупува од нив.

-Од нас сточарите млекото го земаат евтино за 50 денари и тоа не е исплатливо. Не е исплатливо, ништо не правиме со него. Лани беше 40 денари, оваа година 50 денари овчо млеко. Едно кафе во кафич е 60-70 денари, а едно литро овчо млеко е 50 денари, вели Бајрам.

Забележува дека сточарите само се залажуваат пред празниците, кога цената се качува за одвај десет денари. Бајрам со сточарство се занимава од неговата 15-та година.

Во тек е стручен надзор, а во меѓувреме се очекува извештајот од обдукцијата за смртта на шестгодишното девојче во Битола, по што може да се каже каква била причината за смртта на девојчето, изјави денеска на собраниска седница заменик-министерката за здравство Маја Манолева.

Манолева одговараше на прашање на пратеникот Петар Ристески од ВМРО-ДПМНЕ, кој рече дека некој мора да сноси одговорност доколку ја има за смртта на девојчето, но и за битолаченост кој почина од цистична фиброза

-Завршен е вонредниот инспекциски надозр на ДЗСИ, во тек е стручен надзор кој го иницираше Министерството за здравство, а во меѓувреме се очекува и обдукциониот наод којшто треба да ја даде точната причина за смртниот исход на шестгодишното девојче. Согласно сите овие информации и по доставување на институциите дури тогаш можеме да кажеме за каква причина за смрт за шестгодишното девојче се работи, рече Манолева.

Заменик-министерката за здравство одговарајќи на пратеничко прашање за набавката на „трикафта“ и ослободување на болните од цистична фиброза, рече дека по донесување на измените на соодветниот закон во Министерството за здравство е формирана работна група која ќе работи околу препораките за пациентите кои треба да примаат лек за цистична фиброза и на правилници за да може да се импелемнтира законот за директно преговарање и набавка на лекот трикафта за цистична фиброза, рече Манолева.

Во однос на ослободувањето од партиципација на овие болни над 26 години, рече дека следуваат измени во Законот за здравствено осигурување за што рече дека ќе се потруди да бидат ставени во него.

Комисијата за употреба на имиња на личности даде негативно мислење за употреба на името Цар Борис III во називот на Здружението за афирмација на културните вредности на македонските Бугари Цар Борис III Охрид.

На денешната седница Комисијата, како што информираат од Министерство за правда, даде негативно мислење за употреба на името Цар Борис III во називот на Здружението за афирмација на културните вредности на македонските Бугари Цар Борис III Охрид.

-Заклучокот од седницата ќе се проследи до министерот за правда кој ќе треба да донесе решение по претходно добиеното негативно мислење од Комисијата, се вели во соопштението.

Комисијата, се вели во соопштението, смета дека евентуалното именување  на здружението со таков назив предизвикува тензии и нетолеранција во целото македонско општество.

-  Се наведе дека тој е одговорен за злосторства извршени за време на бугарската окупација на Македонија во Втората светска војна, при што се ликвидирани стотици граѓани. Посебно беше потенцирано мислењето дека неговата соработка и сојузништво со Третиот рахј и нагласената антисемитска политика се најдиректно одговорни и за депортацијата и екстерминацијата на илјадници Евреи од Македонија во логорот на смртта Треблинка, се вели во соопштението.

Apple ќе ги донесе најбараните функции во следното издание на оперативниот систем iOS, а можеби и инсталација на апликации од други извори.

Најновото издание на iPhone оперативниот систем, iOS 17, првично требаше да ги поправи баговите и да ги подобри перформансите. Сепак, Apple го промени својот план и сега очекуваме софтверско издание со многу подобрувања и дополнувања кои корисниците ги побарале.

Според доверливиот аналитичар Марк Гурман, развојот на оперативниот систем iOS 17, интерно наречен Dawn, првично бил понизок приоритет поради развојот на Apple Reality очилата, но за среќа на корисниците, тоа се променило.

Гурман вели дека iOS 17 сега ќе вклучува неколку корисни функции наменети за исполнување на некои од најпопуларните барања на корисниците, но нема информации за тоа какви би можеле да бидат тие додатоци.

Една од функциите што многумина ја очекуваат е дефинитивното „отклучување“ на продавницата за апликации App Store, односно овозможување на корисниците да инсталираат апликации од друг извор освен Apple - нешто во што корисниците на Android уживаат од самиот почеток. Откако Европската Унија го усвои Законот за дигитални пазари, компаниите како Apple мора да дозволат други компании да работат во нивниот екосистем. Токму затоа наскоро повторно би можеле да го видиме Fortnite на уредите на iPhone.

ЕУ нема да го применува новиот закон до средината на 2023 година, а последиците од негово игнорирање ќе бидат применливи дури од 2024 година. Така, Apple има уште малку време, па не е нереално да се очекува промена веќе овој јуни, кога новиот оперативен систем ќе биде објавен на настанот WWDC во јуни.

Од друга страна, корисниците на iPhone штотуку го добија ажурирањето на iOS 16.4 кое вклучува поправени багови и мали промени. Apple го наведува 21-то ново емоџи како најголема промена, но за многумина, известувањата за веб-апликациите на почетниот екран, како и подобрената гласовна изолација во телефонските разговори, веројатно ќе значат многу повеќе.

Дополнително, подобрено е откривањето судири, а има и нова опција за автоматско затемнување на видеото во случај на трепкачки светла. Целосната листа на промени можете да ја најдете на веб-страницата на Apple.

Наместо миниван, Renault се одлучи за теренец.

Со децении, Renault Espace беше синоним за пространи миникомбиња, но како што знаете, таа класа на автомобили денес изумира.

Донекаде очекувано, Espace стана SUV, зголемена верзија на компактниот Austral, со 7 седишта (достапен е и со 5 седишта).

Ако е некаква утеха, Renault вели дека новиот Espace е 215 килограми полесен од миниванот во заминување.

Кај моделот со пет седишта волуменот на багажникот е 777 литри, додека кај верзијата со 7 седишта багажниот простор е скромен и изнесува само 159 литри. Со преклопување на третото седиште, багажникот може да се зголеми на 677 l.

Внатрешноста е речиси иста како и Austral, со 12,3-инчен дигитален инструмент табла и 12-инчен централен мултимедијален екран на системот.

Во понудата најпрво ќе биде хибрид со вкупно 200 КС и 205 Nm, во чиешто срце е турбо-бензинец. Повеќе технички детали ќе бидат познати наскоро...

Освен што има надградена задна суспензија, новиот Espace нуди и систем за управување со задните тркала (кај некои верзии). Со овој систем кругот на вртење е намален на 10,4 м, како кај моделот Renault Clio, додека без него е 11,5 м.

Renault ќе почне да прима нарачки за новиот Espace оваа пролет.

ГАЛЕРИЈА: Новиот Renault Espace од секој агол

Како што пишуваат шпанските медиуми, колумбиската пејачка Шакира пронашла нова љубов.

Откако долгогодишната врска меѓу Жерард Пике и Шакира се распадна поради љубовната врска на фудбалерот, познатата поп пејачка планира да се пресели.

Како што пренесува порталот OK Diario, Шакира долго време негува добри односи со мистериозниот маж кој го запознала во Мајами, а тоа е една од потенцијалните причини поради која планира семејна преселба.

„Изгледа дека колумбиската пејачка нашла нова љубов со мистериозен маж кој наводно го запознала во Мајами и со кој е во контакт четири месеци“, пишува OK Diario.

Споменатиот портал не понуди повеќе детали за мистериозниот љубовник, но потврди дека тоа не е бившиот на Шакира, со кој се забавувала пред Пике - Антонио де ла Руа.

Во нова студија објавена во списанието Journal of Cosmetic Dermatology, двајца дерматолози од Индија напишаа: „Витаминот Д е комплексно вклучен во различни сигнални патишта за раст и диференцијација на фоликулите на косата“.

Признавајќи дека витаминот Д има ефект врз растот на косата, тие заклучиле дека витаминот Д има потенцијален терапевтски ефект врз губењето на косата.

Витамин Д и алопеција

Иако во оваа анализа нема докази за силна поврзаност помеѓу недостатокот на витамин Д и ќелавоста, научниците се повикуваат на една претходна студија која покажа поврзаност помеѓу ниското ниво на витамин Д и алопецијата - тип на ќелавост што влијае на 3 проценти од мажите и жените. Алопеција се јавува кога фоликулите на косата се трајно оштетени и заменети со развој на ткиво со лузни.

Витамин Д и здравје на кожата

Можно објаснување за улогата на витаминот Д во спречување на опаѓањето на косата е дека витаминот Д исто така игра улога во подмладување на кожата.

Витаминот Д помага да се создадат повеќе фоликули на косата

Експертите за убавина и велнес се обидоа да ја објаснат улогата на витаминот Д во обновувањето на косата.

Д-р Ракел Кохран Гатерс вели дека витаминот Д е еден од витамините растворливи во масти потребни за одржување и создавање функционални фоликули на влакното.

Луѓето кои тешко стануваат од кревет наутро се попаметни, покреативни и посреќни од луѓето кои се ранобудни.

Оваа теза ја потврди истражувањето на психологот Сатоши Каназава од Лондонскиот факултет за економија. Каназава објаснува зошто времето на будење е знак на интелигенција.

Веќе подолго време, на мобилните телефони постои опција за одложување на алармот, но се смета дека на телото му е потребно време да се прилагоди на тоа.

„Кога го притискате копчето snooze, вашата инелигенција е супериорна во однос на интелигенцијата на вашите врсници“, вели Каназава.

Истражувањето покажало дека слушањето на својот биолошки часовник наместо слепото следење правила ја развива способноста за следење на сопствените страсти и интереси, поради што тие личности се покреативни и независни.

„За разлика од другите цицачи, луѓето ја имаат таа единствена способност да го надвладеат внатрешниот биолошки часовник. Човекот може да одлучи кога ќе си легне и кога ќе стане од кревет, односно дали ќе биде ноќна птица или ранобудник“, објаснува Сатоши Канази, коавторка на истражувањето.

Психолозите ги анализирале податоците за социоекономскиот статус на 1.229 лица и откриле јасна поврзаност – луѓето кои си легнувале по 23 часот и стануваат по 8 часот наутро обично заработуваат повеќе и водат поквалитетен живот, поради што се посреќни.

Меѓутоа, треба да се има на ум дека и премногу спиење не е здраво. Препораката на експертите е седум до девет часа непрекинат ноќен сон.

Со оглед на тоа дека денес во супермаркетите се нудат најразлични производи без глутен, оваа храна треба да биде на менито на децата само ако патат од интолеранција на глутен, или поточно од автоимуната болест цилијакија, истакнуваат лекарите од Германското здружение на педијатри.

Цилијакија е хронично заболување што се карактеризира со интолеранција на глутен, што е составен дел на голем број намирници што ги внесуваме во секојдневната исхрана. Се појавува како хронично воспаление на цревата и често се јавува токму кај најмалите.

При ваква дијагноза, безглутенската исхрана е неопходна, но кај здравите деца нема никаква потреба од храна без глутен за да не дојде до недостиг на останатите хранливи состојки важни за нормален раст и развој на детето.

Храната без глутен најчесто содржи повеќе маснотии, шеќери и сол, а помалку витамин Б, железо и фолна киселина. Поради тоа, ако исхраната на деца кои не боледуваат од цилијакија е баззирана само на вакви производи, може да резултира со нуспојави, како прекумерна дебелина.

Луѓето кои јадат безглутенска храна без да имаат здравствени причини за тоа, внесуваат и помалку растителни влакна што се важни за здрав систем за варење, предупредуваат лекарите и додаваат дека со исфрлање на глутенот од исхраната на деца кои не се болни од цилијакија може да направите поголема штета отколку корист.

Глутенот е мешавина од два вида протеини – глутенин и проламин – што најчесто се наоѓаат во житарки како пченица, ‘рж и јачмен, како и во намирници за кои повеќето луѓе не знаат дека содржат глутен, како крем супи, соја сос и пиво.

Од своето основање во 2005 година, YouTube постигна фасцинантен раст и бележи неверојатна статистика.

Популарноста на YouTube не опадна дури и со појавата на други платформи, па не е чудно што голем број видеа достигнаа повеќе од милијарда прегледи.

Популарната детска песна Baby Shark моментално е најгледаното видео на YouTube со над 12 милијарди прегледи.

Создадена од јужнокорејската едукативна компанија Pinkfong и изведена од корејско-американската пејачка Хоуп Сегоин, детската песна се појави на YouTube во 2016 година и стана вирален хит во Азија, а подоцна и низ целиот свет.

Според агенцијата We Are Social, на второ место е песната Despacito во изведба на порториканскиот пејач Луис Фонси.

На третото и четвртото место се и детските песни Johny Johny Yes Papa и Bath Song.

Меѓу првите пет е хитот на Ед Ширан „Shape of You“ кој има над пет милијарди прегледи.

Интересно е што меѓу топ 10 го нема глобалниот хит Gangam Style, кој е прегледан „само“ 4,7 милијарди пати.

ЈП „Улици и патишта“ - Скопје информира дека поради демонтажа на оштетен полупортален семафорски столб на кростосницата помеѓу булеварите „Борис Трајковски“ и „Србија“ ќе биде забавен сообраќајот во тој дел од Скопје.

- Апелираме до граѓаните за трпение до завршување на работите со цел да се воспостави безбедност во движењето и да се врати нормалниот тек на движење на возилата, соопшти јавното претпријатие.

За време на пандемијата на коронавирус, градските власти на Ванкувер ја започнаа кампањата Slow Street. Идејата се заснова на две бетонски бариери кои ги стеснуваат патиштата и го насочуваат возачот да помине меѓу нив со намалена брзина.

Властите ширум светот прават сè за да ја ограничат брзината на градските патишта, а овој систем во Канада е еден од новитетите. Сепак, не е сигурно дали овој проект е најдобриот што би можеле да го смислат сообраќајните експерти.

За време на пандемијата на коронавирус, градските власти на Ванкувер ја започнаа кампањата Slow Street. Идејата се заснова на две бетонски бариери кои ги стеснуваат патиштата и го насочуваат возачот да помине меѓу нив со намалена брзина.

Локалната новинарка Џил Бенет неодамна се пожали на Twitter дека бариерите водат до чести несреќи. Таа објави и фотографија од Dodge Durango заглавен на една од овие бариери.

Бетонските бариери се наоѓаат на улици каде што има чести сообраќајни несреќи или проблеми со неприлагодување на брзината, особено кога таквите патишта се вкрстуваат со други патишта. Во Ванкувер се поставени дури 42 бариери.

Но, не сите размислуваат како Бенет - многумина го поддржуваат овој проект.

Играчот на Палмејрас помислил дека за да стане добар играч налик на Кристијано Роналдо доволно е да следи сличен начин на исхрана како Португалецот. Ефектите ги оцени како катастрофални.

Одамна се знае дека Кристијано Роналдо многу внимание посветува на својата исхрана. Редовните тренинзи и посветеноста не би имале таков ефект без правилна и здрава исхрана. Во една прилика еден негов поранешен соиграч од Јувентус рече: „Секогаш истото. Брокула, пилешко и ориз. Со литри вода, дефинитивно никако Coca-Cola“.

Сега Роналдо игра во Саудиска Арабија, а неговото тело е исто. На другата страна на светот, во Бразил, играчот на Палмејрас, Габриел Менину, решил да ја проба диетата на Роналдо во обид да си ги подобри перформансите. Сега има 22 години, а диетата ја следел пред три години кога бил разочаран од тоа што бил трета опција на неговата позиција во средниот ред кај тогашниот тренер Абел Ферејра.

Почнал со она што успеал да го дознае за диетата на Роналдо: јајце и суплементи за појадок, повторно суплементи пред тренинг, попладнето и пред спиење, потоа риба или месо на скара со салата за ручек и вечера. Тоа е исхрана пребогата со протеини, но со минимален внес на шеќери и масти и целосна забрана за газирани и алкохолни пијалаци.

„Се загревав и единственото нешто на кое мислев беше: 'Ќе умрам'. Пет минути по почетокот на натпреварот не можев повеќе да трчам, сакав да побарам замена“, раскажува Менину.

За негова среќа еден од соиграчите имал потреба од лекарска интервенција, па Менину прекинот го искористил за да се напие изотоник и да се намачка со гел. Потоа некако го доиграл натпреварот.

Од таа сезона 2020 Менину сега е стандарден играч на Палмејрас, со освоени титули меѓу кои и 2 во Копа Либертадорес и над 140 одиграни натпревари за Палмејрас, а чука и на вратата на бразилската репрезентација. Но, хранејќи се како сите обични смртници, само не како Кристијано Роналдо.

Сите хормонски контрацептиви го зголемуваат ризикот од развој на рак на дојка, вклучително и сè попопуларната пилула која содржи само прогестин, според истражувањето објавено денеска.

Научниците кои го спроведоа истражувањето нагласија дека зголемениот ризик од развој на рак на дојка треба да се мери со придобивките од хормоналните контрацептиви, вклучително и заштитата што ја обезбедуваат од други форми на рак кај жените.

Претходните истражувања покажаа зголемен ризик од развој на рак на дојка во случај на земање дво-хормонални или комбинирани контрацептиви кои содржат и естроген и прогестин.

Употребата на контрацептивни средства само со прогестин е зголемена во последните десет години, но претходно беа спроведени малку истражувања за нивната поврзаност со ракот на дојката.

Истражувањето, објавено во списанието PLOS Medicine, покажа дека ризикот од развој на рак на дојка кај жените е приближно ист во случај на земање хормонални контрацептиви кои содржат и естроген и прогестин, како и кај оние кои содржат само прогестин. Според истражувањата, жените кои користат хормонална контрацепција имаат 20 до 30 отсто поголем ризик за развој на рак на дојка во споредба со оние кои не ја користат.

Резултатите се слични на оние од сеопфатна студија од 1996 година.

Ризикот е приближно ист без оглед на начинот на употреба - пилулата што се зема орално, спиралата, имплантот или инјекцијата - без разлика дали се работи за комбинирана пилула или само прогестин.

Имајќи предвид дека веројатноста за рак на дојка се зголемува со возраста, авторите на студијата го пресметале апсолутниот ризик поврзан со земање хормонални контрацептиви.

За жените кои земале хормонална контрацепција во период од пет години на возраст од 16 до 20 години, биле забележани осум случаи на рак на дојка на 100.000 жени. Меѓу оние на возраст меѓу 35 и 39 години, регистрирани се 265 случаи на 100.000.

„Никој не сака да слушне дека хормоните што ги зема ќе го зголемат ризикот од развој на рак на дојка за 25 проценти“, вели Џилијан Ривс, професор по статистичка епидемиологија на Универзитетот во Оксфорд и коавтор на студијата.

„Овде зборуваме за многу мало зголемување на апсолутниот ризик. Таквото зголемување треба да се гледа во контекст на она што го знаеме за многуте придобивки од земањето хормонални контрацептиви“, додаде Ривс.

„Не само кога станува збор за спречување на несакана бременост, туку и затоа што знаеме дека оралните контрацептиви всушност обезбедуваат доста голема и долгорочна заштита од други видови на рак кај жените, како што се ракот на јајниците и ракот на ендометриумот.“

Истражувањата исто така потврдија дека ризикот од развој на рак на дојка се намалува откако жената ќе престане да користи хормонална контрацепција.

Стивен Дафи, професор на Универзитетот Квин Мери во Лондон, кој не бил вклучен во истражувањето, ги опишал резултатите како „охрабрувачки бидејќи ефектот е скромен“.

Истражувањето опфати податоци собрани од речиси 10.000 жени на возраст под 50 години кои развиле рак на дојка помеѓу 1996 и 2017 година во Обединетото Кралство, каде што употребата на контрацептивни средства само со прогестин сега е исто толку распространета како и употребата на комбинирани контрацептиви.

Ривс рече дека има неколку објаснувања за зголемената употреба на контрацептивни средства само со прогестин. Се препорачуваат за жени кои дојат, оние кои се изложени на ризик од кардиоваскуларни проблеми или пушачи над 35 години.

„Можеби тоа е само затоа што жените сега веројатно ќе земаат хормонална контрацепција подоцна во животот. Затоа, тие се природно изложени на поголем ризик од оние други состојби во кои ризикот е зголемен во случај на земање комбинирани контрацептиви“.

Владејачката Шкотска национална партија (СНП) го одбра Хумза Јусаф за лидер на партијата, човек кој ја има пред себе најважната цел - да стави крај на тривековната унија помеѓу Шкотска и Англија.

Во СНП се водеше жестока борба која ги разоткри длабоките поделби во партијата во врска со политиката и застанатата кампања за независност. За нов претседател е избран Хумза Јусаф.

Јусаф го презема водството на партијата со најважна цел - да стави крај на тривековната унија на Шкотска со Англија. Тој на функцијата ја наследува Никола Старџен, која поднесе оставка во февруари. За неговиот избор за премиер шкотскиот парламент ќе се изјасни утре.

Старџен 8 години беше премиерка на Шкотска. Имаше најдолг премиерски стаж, а беше првата жена на оваа позиција во историјата на Шкотска. Единството во СНП беше разбиено поради различните ставови околу вториот референдум за независноста на Шкотска, односно околу неговото организирање. Воедно, тука се и различните ставови околу тоа кој е најдобриот начин за спроведување на социјалните реформи, како што се правата на трансродовите лица.

Инаку, 37-годишниот Хумза Јусаф е првиот муслиман лидер на Шкотска и воедно ќе стане прв муслиман кој предводел земја во Западна Европа, доколку биде потврден за премиер. Роден е во Глазгов, каде дипломирал политички науки, по што работел како помошник пратеник во шкотскиот парламент пред во 2011 година и да биде избран за пратеник.

Неговиот татко Музафар е роден во Пакистан и имигрирал во Шкотска во 60-тите, додека неговата мајка Шааиста Бута е од Кенија, но од семејство на јужноазиски имигранти. За националните медиуми Хумза рече дека независна Шкотска во првите пет години треба да одлучи дали да се оддалечи од монархијата и да има избран шеф на државата.

Јусаф изјави дека на Шкотска ѝ е потребна независност повеќе од било кога. „Ние ќе бидеме генерацијата што ќе ја донесе независноста на Шкотска“, рече тој во говорот откако беше објавено дека е избран за претседател на СНП. Јусаф како свои цели ги наведе повторното организирање референдум за независност и решавање на економската криза.

Новоизбраниот лидер наведе дека Обединетото Кралство нема право на вето на законот за пол во Шкотска, обеќавајќи дека ќе го оспори потегот на Лондон да го блокира законот кој им олеснува на луѓето да си го променат полот. Британската влада изнесе планови за блокирање на нацрт-законот за реформи во Шкотска за признавање на полот усвоен од шкотскиот парламент.

Иако муслиман, Јусаф е силен поддржувач на ЛГБТ заедницата. На темата за истополови бракови тој еднаш рече: „Верувам дека човековиот брак, ако се работи за геј, и се венчани, дека нивниот брак не е инфериорен или помалку вреден отколку бракот на хетеросексуалните индивидуи. Јас не верувам дека геј сексот е грев“.

Јусаф е двапати женет, еднаш разведен, и има две деца.

На почетокот на овој месец, Владимир Путин беше обвинет од Меѓународниот кривичен суд (ICC) за илегално депортирање деца од Украина во Русија, а пред да добие шанса да се соочи со правдата пред судот во Хаг, тој би можело да биде „замолчен“ од елита на неговата земја, вели рускиот аналитичар Влад Михенко.

Експерт за посткомунистичка трансформација на Источна Европа и поранешниот Советски Сојуз од британскиот универзитет Оксфорд објасни за Newsweek дека Владимир Путин би можел да биде замолчен од „силовиките“, елитна група руски бизнисмени и истакнати политичари, пренесува Вечерњи лист.

„Со оглед на широките врски на Путин низ Европа и она што тој потенцијално би можел да им го каже на судиите за корупцијата и непријатните зделки меѓу Москва и главните западни престолнини, ќе има многу поттик да се замолчи пред Хаг“, истакнува Михенко. Тој додава дека налогот за апсење на ICC го направи Путин многу поранлив дома. Иако Москва не ја признава јурисдикцијата на ICC и не ги екстрадира своите државјани, Михенко истакна дека Путин би можел да биде уапсен и испратен на суд во Хаг ако биде отстранет од власт или ако руските елити го организираат неговото апсење за да го соборат.

Иако Кремљ се обидува да го исфрли налогот за апсење под тепих, Михенко верува дека ако Путин ризикува да ги посети земјите-членки на ICC и „западне во неволја“, тоа може да биде резултат на тоа што безбедносните сили го поставиле неговото апсење „за да се ослободат од него “ или со цел да се обноват односите на Русија со Западот. Михенко неодамнешните изјави на поранешниот руски претседател Дмитриј Медведев ги смета за „прилично извонредни“.

Средба со надлежните од Министерството за финансии и денеска побараа вработените од Министерството за култура, Управата за културно наследство и Агенцијата за филм, на третиот ден од протестот што го одржаа пред Владата. Тие уште еднаш го искажаа незадоволството од своите месечни примања.

Од протестот беше испратен апел министерот за финансии да го одобри Колективниот договор за вработените во Министерството за култура, Управата за културно наследство и Агенцијата за филм, со кој сите вработени по принципот на Министерството за финансии, ќе добијат зголемена плата во износ од 30 проценти.

протест министерство за култураПротест на вработени од министерство за култура

- Три дена молк, во кои ги добивме и најновите информации од Собранието, кои говорат дека на вработените во оваа институција, со измени и дополнувања на Законот за Собранието на Северна Македонија, од 23 март оваа година, објавен во Службен весник на РСМ бр 65/2023 година, им се зголемува платата, односно се зголемуваат бодовите по звања и вредноста на самиот бод кој се врзува со минималната плата. Очигледно е дека постои нерамноправност меѓу вработените во јавниот сектор. Едни се во привилегирана состојба, а останатите треба да молчат и да се помират со фактот дека своите работни обврски и задолженија треба квалитетно и навремено да ги извршуваат за плата од 25 илјади денари, изјави денеска претседателот на Синдикалната организација на УПОЗ при Министерството за култура, Бранко Костовски, напоменувајќи дека нема да се откажат од протестот се до исполнувањето на барањата.

На денешниот протест учестуваа и претставници на Синдикатот на културни работници (СКРМ), кои изразија поддршка, а како што најави Костовски, наскоро очекуваат да им се придружат и нивни колеги од другите министерства.

- Ако во финансии велат дека потпишувањето на Колективен договор со нашите институции не е во корелација со процеост на фискална консолидација за наредниот срендорочен период, како се оправдува зголемувањето на платите на вработените во ова Министерство? Бараме од Владата и од премиерот да не дозволат ваква поделба на дел од вработените во јавниот сектор. Го бараме само она што ни следува, достоинствена плата за работата и одговорностите што ги имаме. Ова наше незадоволство кое секој ден се изразува преку присуството на вработените, јасно говори дека ние самите сме ги надминале сите предрасуди и поделби и дека сме обединети во нашите заложби за зголемување на платите во секторот култура, додаде Костовски.

Генералниот секретар на Синдикатот на УПОЗ, Бојан Трипуновски на протестот укажа дека со укинувањето на членот 4 од Законот за плати и други надоместоци за избраните и именуваните лица, платите на функционерите ќе се зголемат согласно коефициентот на сложеност на работното место, кој ќе се множи со просечната плата исплатена на државно ниво.

Со оваа измена, како што рече, платите на функционерите ќе се зголемат и двојно, а административните службеници треба да бидат задоволни со усогласување на платите со порастот на минималната плата.

Генералниот секретар на Синдикатот на УПОЗ, Бојан Трипуновски Генералниот секретар на Синдикатот на УПОЗ, Бојан Трипуновски Фото/МИА

- Надлежните не најдоа за сходно оваа група на вработени да ги удостојат со прием и да ги слушнат нивните барања. Затоа, сакам да го прашам министерот за финансии Фатмир Бесими, дали оваа група на вработени работи помалку сложени работи од вработените во Министерството за финансии? Министерот за финансии се јавува како главен кочничар,  кој не ги одобрува колективните договори, односно не дозволува за одредена група на вработени да се покачат платите како што се покачени во ова Министерство, рече Трипуновски.

Вработените во Министерството за култура имаат Колективен договор, кој според она што го имам видено е еден од подобрите за работниците ако ги погледнете нивото на бенефиции во делот на плати кои ги дава. Сепак, вработените може да разговараат со надлежните во Министерството и во однос на остварување на своите права и секогаш секој има право да побара поголема плата, истакна денеска премиерот Димитар Ковачевски.

- На вработени во одредени сектори секогаш правото на протест им било на располагање, ние сме демократска земја. Направивме зголемување на минималната плата, која согласно со новата методологија е зголемена за 2.175 денари и важи за сите вработени во државата, што значи дека нема да има никој плата под ова. Линеарно зголемување за 2.175 денари ќе има и за околу 27.000 работници кои имаат колективни договори што се усогласени со Законот за минимална плата, рече Ковачевски во одговор на новинарско прашање при денешната посета на маркет во Скопје заедно со министерот за економија Крешник Бектеши и директорот на Државниот пазарен инспекторат Горан Трајковски.

Премиерот порача дека помина времето од пред шест години кога дел од работниците кои работеа во кожарската и текстилната индустрија примаа и помала плата од 8.000 денари, што беше минимална плата во тоа време.

- Министерството за труд и социјална политика веќе одржа два состанока на Економско социјалниот совет на кој се разговара на нов општ колективен договор. Се работи и на Закон за плати, со кој ќе се уредат платите од највисоката до најниската во државата, бидејќи во моментов имаме неконзистентност на плати и има регулаторни тела, институции каде плата за работник кој не обавува управувачка функција или функција која во хиерархијата има големи нивоа на раководења, има поголема плата и од претседателот на држава и претседателот на Уставен суд  и од многу други кои извршуваат поодговорни функции, посочи Ковачевски.

Тој ги повика синдикатите да учествуваат во креирањето на овој закон со цел, како што кажа, да има системско решение по примерот на држави кои тоа го имаат уредено, но и во земји во регионот.

Анте Ребиќ (29) би можело да го напушти Милан, објави La Gazzetta Dello Sport.

За трансферот на хрватскиот фудбалер се пишуваше со месеци, а La Gazzetta го стави на списокот на оние кои би можеле да заминат во текот на летниот преоден рок. Покрај Ребиќ, италијанските медиуми ги споменуваат и Јуниор Месијас, Астер Вранкс и Јасин Адли.

„Незаборавната година на Ребиќ беше одбележана со повреди, а не со голови. Анте никогаш не беше супер напаѓач. На врвот на кариерата постигна 12 гола во првата сезона во Милан, како и во 2012/2013 година во Сплит, но никогаш не постигна исто толку малку како во последните две сезони, а тоа беа по три гола. Има ужасен просечен рејтинг (5,71), а влезе како замена 16 пати, двојно повеќе отколку што играше во првите 11“, стои во текстот на La Gazzetta.

Ребиќ за Милан одигра 116 натпревари

Тие наведуваат како повредите го создале првиот дел од проблемот, додека за вториот одговорен е Рафаел Леао, најдобриот играч на Милан кој го зазеде неговото место.

„Ребиќ сега не игра подобро, ниту во пролетната сезона, што историски беше случај. Поради сето тоа, вклучувајќи ја и годишната плата од 3,5 милиони евра, клубот размислува за продажба“, заклучува La Gazzetta.

Од 2019 година до денес Ребиќ одигра 116 натпревари за Милан, кој го купи од Ајнтрахт Франкфурт за 6,7 милиони евра. Тој постигна 29 и асистираше за 17 гола. Неговиот договор е со важност до 2025 година. Трансфермаркт неговата вредност ја проценува на десет милиони евра.

Во моментов има 102 пријави за експлозивни направи во училишта во регионите Плевен, Сливен, Варна, Бургас и Софија, а мејловите се речиси идентични. Нема реална опасност. Тоа денеска го изјави бугарскиот главен секретар на Министерството за внатрешни работи, Петар Тодоров.

Според него, вработени од Генералната дирекција Борба против организиран криминал со две партнерски служби работат на насоки за приведување лице инволвирано во заканите, а кое е надвор од територијата на Бугарија.

– Во рок од два дена работна група ќе изработи процедура што строго ќе го регулира постапувањето во вакви ситуации, изјави Тодоров и додаде дека во ниту еден случај нема закана за изборите в недела.

– Досега, 25 училишта и еден универзитет во Софија добија закани за експлозивни направи, изјави градоначалничката на Софија, Јорданка Фандакова.

Вработените во Министерството за внатрешни работи на Бугарија работат на близу 400 оперативни и 270 отворени сигнали поврзани со изборниот процес, има 75 поведени предистражни постапки.

Актерката Брук Шилдс изјави дејка нејзиниот поранешен сопруг Андре Агаси имал жестока реакција на нејзината улога во серијата „Friends“ во 1996 година.

Како што вели во интервју за New Yorker, на нејзиниот тогашен партнер Андре Агаси воопшто не му се допаднала сцената во која таа му ја лиже раката на Џои, кого го играше Мет ЛеБланк.

Откри дека тогаш тенискиот шампион заминал дома и почнал да ги крши своите трофеи.

„Андре беше во публика и ме гледаше, а потоа истрча надвор. Рече: 'Сите ми се смеат. Направи будала од мене со таквото однесување'. Јас му реков: 'Тоа е комедија? Што ти е на тебе?'“, раскажува Брукс, која во дводелниот документарец „Pretty Baby: Brooke Shields“ отворено зборува за својот живот, вклучително и за трауматичниот сексуален напад.

Шилдс подоцна дознала дека Агаси користел кристален метамфетамин отприлика во тоа време, за што тенисерот години потоа и отворено зборуваше.

„Неговото ирационално однесување сигурно имаше врска со тоа“, заклучи актерката.

Шилдс и Агаси беа заедно од 1993 година, а во брак беа од 1997 до 1999 година.

Во „Friends“ се појави во епизодата „The One After the Superbowl: Part 1“ од втората сезона каде ја глумеше Ерика Форд, девојка што го демне Џои.